Karrajua - erabilera - Comments

Konpetentzia

Benito — Fri, 05 Feb 2010 14:18:09 +0100

Galdera gehiago zure galderetatik:

Simulazioarekin erabiltzeko konpetentzia ala simulatzeko konpetentzia eskuratzen da?
Hizkuntza erabilera sustatzea ez da azken batean gure lanaren azken xedeetako bat?
Akreditazioak gure azken xede hori bete dugun akreditaten digu?

Aker hau elebiduna benetan. Euskarazko eta gaztelaniazko baliokideen adiera guztiak hartu ditu.

Akerraren adarrak

Plisti-plasta — Fri, 05 Feb 2010 08:28:46 +0100

Zure hitz-jokoak txikitako ’akerrak adarrak okerrak ditu’ hura ekarri dit gogora. Azter dezagun:

Gaitasuna ez da erabilerarako lehen urratsa besterik. Behar besteko konpetentzia izateak ez dakar atzetik erabilera, halabeharrez. Baina honek beste galdera batzuk egitera garamatza:

- Zeren bidez eskuratu eta elikatu beharko litzateke konpetentzia: simulazio hutsaren bidez (probalekuan) ala simulazioaren eta mailan mailako erabileraren bidez (probalekuan eta plazan).

- Zeri begira jarri beharko genuke gure iparrorratz didaktikoa: konpetentziaren akreditazioari ala erabilerari begira?

- Nahikoa al da zenbait kasutan konpetentziaren akreditazioa eskatzearekin?

Akerrak adarrak okerrak ditu.

Lana antolatzeko erak

Ainhoa — Sun, 20 Sep 2009 01:38:27 +0200

Uste dut gai honi buruz lehenago ere nonbait aritu garela, baina bilatzen ez hasteagatik... ;-)

Inoiz ez naiz jarri zenbatzen zenbat denbora eskaintzen diodan lanari eta zenbait aisiari, baina lanari mugak jarri nahi dizkionak ez dio horregatik beldurrik izan behar Facebook eta antzekoak erabiltzeari. Hain zuzen, horregatik gustatzen zaizkit halakoak txat-aplikazioen aurrean: neuk erabakitzen dut noiz noan, zein ordutan eta zer egitera.

Arazoa da "aparteko lana" dela uste denean. Nik aldarrikatzen dut hori irakaslearen zereginetan sartzea, ez erantsiz, baizik eta kurrikulumaren barruan. Ez delako denborapasa, hizkuntzaren ikaskuntzarako beharrezkoa eta gainera lagungarria delako baizik.
Sare sozialen integrazioa ikaskuntzan programatu daiteke, diseinatu, beste edozein zeregin gisa, ez dago zertan eskatu borondatez lan egitea.

Ildo nahasiak

Plisti-plasta — Sat, 19 Sep 2009 10:37:38 +0200

Barkatu gaurko idazkera modua , ez da koherentea ez egoki kohesionatua (ja!) baina hain dira politak ildo nahasiak! Ideiak bururatu ahala botako ditut. Hona:

Ikasgela edo Moodle ezin dira simulazio hutsezko esparru bilakatu, eginahalak eginahala beti egongo da benetako komunikazio fluxuren bat, kontua da fluxu horrek zenbateko oparotasuna daukan. Gela kalera zabalik badago, kalean dago. Kontua da irakasle askok ateak zabaldu baino nahiago duela behatxulotik begiratu.

Txepetxen hizkuntzaren jardunbide esparruak, zirkuluak, datozkit burura , eta ikasleak. Ikasle batzuek ez dute euskara kalerako nahi. Hauek ere nahiago dute behatxulotik begiratu eta ikasgelako atea ixten denean euskara bertan utzi. Ez dute zabaldu nahi Ukan birusak sortzen duen nekea eta ezinegona euren aisialdira, euren bizitza ‘ez profesionalera’. Baina honetan ere neurriak eta neurriak daude. Zotz jokoan bezala sarritan ez dakigu eskuak zotz luzea ala laburra ezkutatzen duen eta bakoitzak izan behar du bere zotzaren luzera hautatzeko aukera. Agian, onartu behar dugu ikaskuntza informalaren eraketa ikasleari berari dagokiola gehienbat (gu ere adabegi izan gaitezkeen arren).

Gaur bertan entzun dut Esperanza Aguirrek berriro ere oholtzak jarri nahi dituela eskoletan. Estatusa bereizketa da. Zu han eta ni hemen. Baina halakoetan niri beti etortzen zaizkit eskolako Venn Diagramak gogora, maistrak elkargunea (multzo-ebaketa baino aproposagoa gaurkoan) gorriz margotzen zuen. Ikasle eta irakasleon artean ere bada zenbait elkargune, horiexek dira , agian, komunikazio gune oparoenak gainera.

Eta zer esan, Benito, Iñaki eta Ainhoa bezalako jendilajeari buruz? Eman birusaz kutsatuta zaudetela. Baina badira zenbait profesional on ogibidea aisialditik kanpo uzten dutenak, eguneko ordu jakin batzuetan bakarrik direnak irakasle eta hautu hori zuena/gurea bezain ona iruditzen zait.
Ai ama, zein ondo nengoen ni Tossako hondartzan betaurreko beltzak jantzita! ;-)

Formala vs. Informala (?)

Ainhoa — Fri, 18 Sep 2009 23:43:15 +0200

Pozten nau eztabaida hona ekarri izanak eta horrela, bide batez, aitzakia paregabea ematen didazue gaiari buruz hizketan segitzeko.

Beharbada komunikatzeko teknologia berri hauek ezkutuan zeuden "versus" asko azaleratu dituzte. Inoiz ez naiz gustura sentitu "ahozkoa vs. idatzizkoa" edo "ulermena vs. ekoizpena" bikote sasi-dikotomikoekin, eta orain garbi dago dikotomikotik ezer gutxi dutela.

"Formala vs. Informala" bikoteak urduritxo sentiarazten zidan eta horregatik sakondu nuen duela urte batzuk. Han azaldu zen pertsonaren psikologia, testuinguru soziala eta kulturala, pertsonarteko harremanaren historia... Continuum bat dela esatera ere ez naiz ausartuko, dimentsio askori begiratu behar zaio hizkuntza-erregistroa erabakitzeko. Horregatik ez dute hain ondo funtzionatzen rol-jokoek eta simulazioek, zaila baita hizkuntza hautatzea rol topikoetan oinarriturik, ez dago elkarriketa-tipologiarik benetan, ezta sikiera ogia erostera joaten gareneko egoera xumeetan ere.

Eta, azkenik, "Irakasle vs. Ikasle", hori bai aspaldiko gezur potoloa. Lotsarik gabe aitortuko dut askoz gehiago dela ikasleek niri irakasten didatena, neuk irakasten diedana baino. Esango nuke "taldearen arduradun" izaten naizela, antolaketaz, moderazioaz, dinamizatzeaz, ikas-prozesuen behatzeaz arduratzen naizela.

Sare sozialen etorrerak nabarmenago pentsarazten dit ea zeren truke jasotzen dudan irakasle-soldata, noraino eraman behar ditudan ziberespaziora nire zeregin profesionalak. Baina horretan ere, berri askorik ez, lehenago ere orduak eman baititut ikasleekin pasiloetan hizketan, tabernan, nire lanordu "ofizialetik" kanpo.

(ez nuke jakingo iruzkin hau sailkatzen: "ni"aren erabilerak informaldu egin du, baita zenbait adjektiboren hautaketak ere, baina aldi berean hitz akademiko-profesional batzuk erabili ditut. Izan ere, ez nuke jakingo blog hau informal/formal sailkapenean kokatzen, continuum bat buruan izanda behinik behin)

Ostiral gaueko zurrunbiloaren emaitza sailkaezina beraz ;-)

Kalekoak

Benito — Fri, 18 Sep 2009 19:26:03 +0200

Epa Iñaki,

Ez dut kontrajarri dituzunik adierazi nahi izan, hausnarketaren zurrunbiloan sortu ditudan kakanahasteetako bat baino ez da izan . Alderantziz, hain zuzen ere "kalea" komatxo artean jarri baduzu nik hausnarketa egin dudan bidetik egin duzula iruditu zait. Hau da, pertsonak ere bagara, irakasleak garen bezala, kalean, ziberespazioan edo ikasgelan

Eta zure komatxoek akordura ekarri didate dikotomia tipiko-topiko hori: kalea vs. ikasgela, ikastea vs. erabiltzea batera garamatzana azken batean, eta igual benetako bereizketa (balego) formala-informala baino ez da, eta bereziketa barik gradazio bat baino ez da hori seguruenik. Hori interpretatu dut Ainhoaren artikulutik.

Dena dela, eta txapa guztiaren ostean, kontatu duzun anekdota hori ezagutu izan banu, askoz mezu laburragoa idatziko nuen, seguru eta ziertoa.

Interesgarria hausnarketa.

Iñaki Murua — Fri, 18 Sep 2009 18:29:20 +0200

Interesgarria hausnarketa. Dena den "kalea" nioen Benito, besteak beste, ez hainbeste kontrajartzea egin nahian, ziberespazioan edo "hirugarren ingurunean" (Javier Echeverriaren kontzeptuan)gizakiak garelako baizik. Oraindik eta zorionez behintzat.

Horregatik, Tuentiri buruzko aipamen bat gogorarazi zidan Ainhoak idatzitakoak. Tuentin zer portaera izan ikasleekiko galdetu zuen batek, eta beste batek erantzun, "eta kalean ikasleak agurtu egiten dituzu?"

Eskerrik asko, Martin

Benito — Wed, 09 Sep 2009 17:41:21 +0200

Eskerrik asko loturagatik Martin. Eztabaida interesgarria izan daiteke kontu hau guztia hala ere. Idiak idi, gero eta txekor gehiago dabiltza han eta hemen, eta uztarria zeinen neurrira egin ez da kontu erraza izango.

"(...) inguruko horiek ere

Martin Rezola — Wed, 09 Sep 2009 13:54:46 +0200

"(...) inguruko horiek ere ez dira gutxi, ez horixe, eta merezi dute hitza eurei ere zuzentzea, ezta?"

Horixe baietz. Niri primeran iruditzen zait, zenbat eta gehiago, orduan eta hobeto. Baina ez ahaztu gurditik idiek tiratu behar dutela, eta ez alderantziz.

Eztabaidari literatura aldetik heldu dioenetako bat Joxerra Garzia izan da

http://www.argia.com/argia-astekaria/2178/jasoko-bada-jaso-behar-da/osoa

Ondo segi!

Helduen euskalduntzea

Benito — Fri, 11 Jul 2008 01:10:35 +0200

Eskerrik asko, Txerra. Irakurri dut Erramunena. Helduen Euskalduntzea erabilerarekin lotu bai, "persona helduen euskalduntzea areagotuko dan, hartarako erabileran eraginez" dio. Ez dut ondo interpretatzen zer esan nahi duen baina.

Zer esanik ez dago HEAn dihardugun gehien-gehienok horixe daukagula gogo-ametsetan, gurekin ikasten den euskara bizia izan dadila, eta "erabil" dadila. Galdera betikoa da hala ere (hari honetan planteatu duguna hain zuzen ere), "Zelan?". Nola lortu helduaroan euskara ikasi duten horiek euskara erabiltzea?

Dena dela, artikulua datorren ingurumaritik etorrita, interesgarria izango litzateke hangoek gogoan zer duten jakitea.

eta lotura ahaztuta

txerra — Tue, 08 Jul 2008 16:08:02 +0200

http://www.bizkaie.biz/blogs/bg3/?p=42

Erabilera eta helduen euskalduntzea

txerra — Tue, 08 Jul 2008 16:07:18 +0200

Aitzol izeneko batek komentarioa utzi du nire blogean Erramun Osak egindako artikulu bati. Eta Erramunek espreski lotzen du helduen euskalduntzea eta erabilera (nahiz eta Aitzoli despitatu). Ikuspuntu berria ote da? Interesgarria litzateke horretan sakontzea.

oporrak behar

aitor — Fri, 04 Jul 2008 14:48:51 +0200

Zuk, Josu, oporrak ez dakit merezi dituzun, baina behar, behar dituzu, alajaina! Hori zotin zibernetikoa daukazuna, txo! Ez dakit Galdakaoko haizeak kalte eginda edo..

Ez agurrik, ez pertsianarik

Benito — Fri, 04 Jul 2008 11:47:53 +0200

Lantokian ez gara egongo batzuk (ez denak, bistan dago), baina Karrajuak ez dauka pertsianarik, Aitor, munduan ordenagailu eta konexio gehiegi daude horretarako batetik, eta burua eta begiak ezin dira amatatu bestetik.

Beraz, erritmoa jaitsi bai, baina Karrajuak irekita jarraitzen du.

Hori bai, uda ondo-ondo pasa denok, oporretan zein lanean.

Opoporrak

Josu — Fri, 04 Jul 2008 09:35:28 +0200

Hau po, hau popo, hau popoz handia... Opo, Opopo, Opoporrak!!
Ondo ibili guztioi, eta kargatu pilak!